သံဃာတွေကို ရိုက်နှက် ဖမ်းဆီး ထောင်ချခြင်း

၂၀၀၇ စက်တင်ဘာ ၅ ရက်နေ့မှာ ပခုက္ကူမြို့က သံဃာ ၅၀၀ ကျော် မေတ္တာပို့ လမ်းလျှောက် ဆန္ဒပြခဲ့ရာမှာ အာဏာပိုင်တို့က အကြမ်းဖက် ဖြိုခွဲပါတယ်။
သံဃာ ၃ ပါးကို ဓာတ်တိုင်မှာ တုပ်နှောင်ပြီး ရိုက်နှက်ခဲ့တဲ့အတွက် မြန်မာပြည် အနှံ့အပြား ရဟန်း ရှင်လူများ ဒေါသထွက်ခဲ့ကြပါတယ်။

ဒီဖြစ်ရပ်ကို အာဏာပိုင်တို့က တောင်းပန်ခြင်းမရှိတဲ့အတွက် နေရာအများအပြားမှာရှိတဲ့ သံဃာတော်တို့က အာဏာပိုင်တွေကို ပတ္တနိကုဇ္ဇန ကံဆောင် သပိတ်မှောက်လိုက်ပါတယ်။

ဒါ့အပြင် သံဃာတော်များ မေတ္တာပို့ ဆန္ဒပြ ကြွချီကြပြီး ဒီဆန္ဒပြမှုဟာ လူထု လှုပ်ရှားမှု အသွင်ကို ကူးပြောင်းသွားပါတယ်။

အာဏာပိုင်တို့က စက်တင်ဘာ ၂၆၊ ၂၇ ရက်နေ့တို့မှာ ရန်ကုန်မြို့ ဆန္ဒပြမှုများကို ပစ်ခတ် ဖြိုခွင်းပါတယ်။
သံဃာ ၂၀၀ ကျော်ကို ဖမ်းဆီး တရားစွဲပြီး နှစ်ရှည် ထောင်ဒဏ်များ ချမှတ်လိုက်ပါတယ်။

အဲဒီလို နှိပ်ကွပ်ခံရသူများထဲမှာ သီလရှင်များလည်း ပါဝင်ခဲ့တာပါ။

သံဃာတချို့ဟာ ရဲဘက် လို့ ခေါ်တဲ့ အလုပ်ကြမ်းစခန်းကို ရောက်သွားပါတယ်။ (အလုပ်ကြမ်းစခန်းရောက် သံဃာတပါး ထွက်ပြေးလွတ်မြောက်ပြီး နယ်စပ်ကတဆင့် ပြည်ပကို ရောက်ရှိသွားပါတယ်)

၂၀၀၇ စက်တင်ဘာလ သံဃာ့လှုပ်ရှားမှုနဲ့ ပတ်သက်ပြီး အွန်လိုင်းကို ရောက်လာတဲ့ ဓာတ်ပုံတွေထဲမှာ ရန်ကုန်မြို့ကို စစ်မြေပြင်လို ကိုင်တွယ်ခဲ့ရာမှာ ပါဝင်တဲ့ စစ်အရာရှိကြီးတယောက်ရဲ့ ဓာတ်ပုံကိုလည်း သတိပြုမိကြမှာပါ။

အဲဒီအရာရှိက အခုတော့ လွှတ်တော်တက်နေပါပြီ။

လွန်ခဲ့တဲ့ ၅ နှစ် ဒီအချိန်မှာ ဖြစ်ပွားခဲ့တဲ့ ပစ်ခတ် ဖြိုခွင်းမှုတွေအတွက် တာဝန်ခံရမယ့်သူများကတော့ အဲဒီကာလ နိုင်ငံ့ခေါင်းဆောင်တာဝန်ယူခဲ့သူများ၊ ပစ်မိန့်ပေးသူများ ဖြစ်ပါတယ်။
ခုချိန်ထိတော့ ဒီဖြစ်ရပ်နဲ့ ပတ်သက်ပြီး စုံစမ်းရေးကော်မရှင် ပေါ်ပေါက်မလာသေးပါဘူး။

ရိုက်နှက်ဖမ်းဆီးခံရတဲ့ သံဃာအများအပြားကို အာဏာပိုင်တို့က ပြန်လွှတ်ပေးလိုက်ပါပြီ။
ဒီလိုပြန်လွှတ်ပေးလိုက်တဲ့အတွက် အာဏာပိုင်တို့ကို ပြုပြင်ပြောင်းလဲရေး လုပ်ဆောင်နေပြီ ဆိုပြီး သတ်မှတ်နေကြတာ တွေ့ရပါတယ်။